كافيه ريش او قهوة ريش

كافية ريش ❤️

كنت فاكر انه شعبي كنت فاكر انه للاجانب كان عندي عنه معلومات غلط ..

كلنا بنعدي على كافية ريش اللي في وسط البلد قرب ميدان طلعت حرب كدة ، بس كتير مننا ميعرفش ايه كافية ريش ده ، كافية ريش اتفتح سنة ١٨٦٤ ، و اعيد افتتاحه تاني سنة ١٩٠٨ يعني قبل الحرب العالمية الأولى ، و تقريبا في نفس السنة اللي اتفتحت فيها جامعة القاهرة ، صاحبها واحد ألماني اسمه "برنارد سينبرخ" ، بناه على انقاض قصر لمحمد علي ، و اول ما الحرب العالمية الاولى بدأت ، صاحبها باعها لهنري بير واحد من فرنسا و رجع على المانيا وقت الحرب ، و سماها ريش على اسم كافية فرنسي مشهور و موجود لدلوقتي .

و بعدين اشتراها منه تاجر يوناني اسمه جورج أيفانوس ، وسعها و ظبطها لحد ما وصلت لايد مصرية في الاخر ، الصعيدي ملاك ميخائيل و هي من سنة ١٩٦٠ ملكه هو و الورثة من بعده ،

طيب كل الكلام ده محفوظ ، ايه اللي مش محفوظ بقا ؟

الاول لازم نعرف ان كافية ريش بقا غالي و بمينيمم ، بس زمان مكنش كدة ، كانوا بيسموه قهوة الغلابة او مقهى الطبقة الوسطى عشان كان رخيص ساعتها ، 

لعاشقين التاريخ ، اللي بيحبوا الاماكن اللي حصلت فيها احداث مهمة او عدى عليها شخصيات بيحبها و بيحب يزورها، عايزك تروح هناك مرة ، تطلب قهوتك ، و تتخيل معايا الحاجات اللي هكتبها دي و انتا هناك .

١- الفنان الملحن محمد أبو العلا جه القاهرة و في ايده طفلة صوتها حلو ، و اتفق مع صاحب الكافية انها تقدم فقرة يومية في الكافية و صاحبها وافق ، الطفلة كان اسمها " أم كلثوم " لابسة عقال و لبس عربي سنة ١٩٢٣ .

٢- البوليس السياسي كان منتشر في ارجاء الكافية و جواسيس الانجليز عشان اخبار تناقلت ان الكافية بيقعد فيه جهاديين 

٣- صاحب الكافية قدم طلب للانجليز انه يقدم اوركسترا ، و الانجليز رفضوا بحجة ازعاج السكان ، و نكاية فيهم راح مقدم الاوركسترا غصب ، و اتضح انه كان بيداري بصوت الاوركسترا صوت مكينات الطبع اللي بتطبع المنشورات .

٤- الكافية كان فيه ممر سري قبيل ثورة ١٩١٩ فيه ماكينات طبع بتتطبع فيه منشورات ضد الانجليز بقيادة شلة عبد الحي كيرة و عبد القادر و بتتوزع من الكافية .

٥- أحمد فؤاد نجم اللي كان من رواد الكافية ، و الشيخ امام اللي كان بردو من روادها ، اول ما اتقابلوا و اتعرفوا كان عالكافية ده 

٦- نجيب محفوظ كان بيعمل ندوة اسبوعية جوا الكافية من سنة ١٩٦٣ ، و صاحب الكافية كان بيخفض سعر المشاريب يومها 

٧- رباعيات صلاح جاهين اول ما اتكتبت ، اتكتبت جوا الكافية ،

٨- اول اجتماع للظباط الاحرار قبل ١٩٥٢، و منشورات الثورة على يد جمال عبد الناصر كانت من جوه الكافية ،

٩- ثورة ١٩١٩ اول ما قامت ، قامت من قدام الكافية ، سعد زغلول كان بيقعد عليها كتير يتكلم في امور المملكة المصرية و ده استنادا لكلام عبد الرحمن الرافعي اللي بدوره كان من رواد الكافية .

١٠- نجيب سرور بدأ تمرده على مجتمع الفنانين ثم الدولة من جوا الكافية ده ،

١١- شعر أمل دنقل ، قصص يوسف ادريس بدأت من جوه الكافية و هما كانوا من رواده .

١٢- كامل الشناوي و أحمد رامي و سليمان بك نجيب و أم كلثوم و القصبجي تعودوا السهر سويا في ترابيزة جوا الكافية على انغام عود القصبجي،

١٣- روز اليوسف كانت بتقدم فقرة مسرحية مع فرقة عزيز عيد جوا بهو الكافية ، و محمد عبد القدوس كان بيغني مونولوجات ، اتعرفوا على بعض جوا الكافية و من جوا بدأت قصة حبهم ، اللي تكللت بطفل اسموه إحسان عبد القدوس .

١٤- يوسف باشا وهبة رئيس وزراء مصر تعرض لمحاولة اغتيال في موكبه ان اترمت عليه قنبلتين لانه موالي للانجليز ، بتمويل من التنظيم السري ل١٩١٩ على ايد عريان سعد ، و اللي كان قاعد عالكافية و نفذ العملية منها .

١٥- ثورة العيش سنة ١٩٧٧ بدأت من جواه ، و بعد فشلها في عهد السادات اتقفل الكافية فترة لحد ما اعيد افتتاحه تاني بعد كام سنة ،

١٦- اول ما مثلت الفنانة فاطمة رشدي كان في ريش ، و صالح عبد الحي كان دائم الغناء في الكافية ، اما عن طه حسين و خلافه مع العقاد فقد تأجج داخل الكافية يوم ما .

١٧- كافية ريش كان ليه جنينة كبيرة بره بتقوم فيها الحفلات و ليالي الأنس ، شهدت الحديقة يوما نزوح الاوروبيين هربا من الحرب كلاجئين بلا مأوى يفترشون الحديقة .

١٨- اسامه انور عكاشة اللي كان من رواد الكافية ، استوحى شخصيات العمدة و الباشا في ليالي الحلمية من اتنين كان بيشوفهم قاعدين في الكافية ، و كمان زينهم السماحي الفتوة من قبضاي لبناني اسمه سليم حداد كان من رواد الكافية كمان ، السريالية المصرية اخترعت جوا الكافية على ايد لويس عوض و رمسيس يونان .

١٩- اليهودي زكي مراد كان معتاد الغناء في الكافية و كان بياخد بنته الصغيرة تتفرج ، ليلى مراد .

٢٠- شاعر النيل حافظ ابراهيم ، قصايده كان بيكتبها و هوا سرحان في فنجان قهوته على ترابيزة ريش . 

٢١- اغلب الموسيقيين في الاربعينات و على رأسهم عبد الوهاب و ام كلثوم اجتمعوا جوا الكافية عشان معاملة الموسيقيين الدنيئة ، و في الاخر اتفقوا على انشاء نقابة للموسيقيين .

٢٢- كافية ريش شاف غارات الحربين العالميتين ، شاف ثورة ١٩١٩ ، شاف المقاومة ، شاف مظاهرات ١٩٣٦ ، شاف الملكية بتنهار و الجمهورية بتعلى ، شاف ١٩٥٢ ، شاف عبد الناصر و التأميم و حرب السادات و معاهدة السلام ، شاف اللي حصل ١٩٧٧ ، شاف مبارك ، شاف ثورتنا و حياتنا .

٢٣_ احمد فؤاد نجم كتب في ريش : 

يعيش المثقف على مقهى ريش، يعيش يعيش يعيش، محفلط مزفلط كتير الكلام ، عديم الممارسة ،عدو الزحام

بكام كلمه فاضية ،وكام اصطلاح يفبرك حلول المشاكل قوام ، يعيش المثقف ، يعيش يعيش يعيش.  يعيش أهل بلدي